خربوشة ( شجرة وتل )

قلت راح اكتب مرة قصيده

وهارسم صورة لشجرة وتل

بس لقيت الوزن اختل

ولما رسمت بهيه شهيده

صرخوا ف قلمي وقالوا مختل

خربوشة ( لون )

لون للقلب نسيج مشبوك

ولون للعقل كلام معكوك

ولون لمبادئ غاليه علينا

وراثه أبويا وجدي وأبوك

خربوشة ( الشر )

نويت الشر واشتريت

ورحت وجيت 

لقيت الشر عشش جوة قلب الناس

وانا وقلبي ولا اتمسيت

خربوشه ( بحبحها )

بحبحها وبوح

علي طول هاتروح

لحواري الشمس الشموسه

ماهي ديا عوا يد المحروسه

خربوشة ( مات الكبير )

مات الكبير 

والصغير شال بداله الهم

وتراب اراضينا اتخرب 

وهواها برضه اتسم

ولا شايفه لون للصورة 

ولا شامه ريحة خير

اااااااه لو كنا يوم نفهم

او حتي يوم نتلم

خربوشة ( حزن )

قاعـــــــــده بشد ف شعري 

وصوتي .............. مكتوم

حزني دفين ف مقابر عمري 

وكل فراغ الكون مسموم

خربوشة ( نقطة مطر )

نقطة مطر غسلتني انا وقلبي

طرحت جناين طرحت غيطان

واكمه خايف . عاش مستخبي

مظهرش عيبه ولا حتي بان

خربوشة ( قدري )

  قدري

مربوطه ف مروحة الكون

لفه بلون الشمس بتضوي 

ولفه بلون الليل مجنون

خربوشة ( امي )

يا ايد بتحضن أيد بحنية

قلبك دا نوع من بشر 

فيه سحر جنيه

لو جابو ألف ملاك 

يطيبو ف قلبي

انتي اللي من وسطهم 

بتسكني عنيا

خربوشة ( زهرة وعنكبوت )

 يازهرة محبوسه 

من جوه خيط العنكبوت

طعم الندي غير معانيكي

طل الربيع من بين

ضلوع الزمن

شافك بتتعذبي

ومقدرش يحميكي

خربوشة ( الرمان )

كمـا حبة الرمـــــــــان خلونـا يوم نتلم

الحب فيه مرصوص احمر بــــلون الدم

وجــــــــدار رقيق ابيض بيقربه ويضـم
 
والأرض طين اسود جامع جــــذور الأم

 
أتجمعوا ياولاد بـــلاد تفرح تشيل الهم

خربوشة ( شباك الحياه )

افتح ياشباك الحياه ضرفتك

افتح ووريني ف يوم بسمتك

وسيب نسيم الكون يطوحنا

يمكن يداوي غربتي وغربتك

خربوشة ( نمله وسط الكون )

يا نمله تايهة وسط الف ميـــــدان 

ولا ليها خل ولا ليهـــا حتي كيـــان

بتدوري علي ايه ياحلوة ف غربتك؟؟

اجري استخبي وشوفي ركن أمان

خربوشة ( طرح الفرح )

ف يوم زرعت الفرحة واستنيت

ف عيوني لمعه وايدي علي خدي 

وجه معاد الجني قمت جنيت

لقيت الطرح حزن متفصل علي قدي

خروشة ( ذنب مين ؟ )

فازت قلوب البشر وخسرت انا قلبي

معرفش ايه ذنبهم ولا عارفه ايه ذنبي

فيه اللي خان او جرح وفيهم المقتول

وفيه يحط السم جوة كلام معسول

 

كان ياما كان

طفل صغير جه راح ماسك
كل كياني
وبعتر فيه
جرح
خرب
كسر
دمر
ضيع كل معانى الكلمه ..
وشد الحرف
من شواشيه
خلي الموقع م الاعراب
جر ومجرور
ضافنى اليه ..
وجاب البنا
جهز مونته
وعلا ما بينى وبينه
السور
طفل وجاي ..
قال طالب يسمع
الف حكايه
والبنوته ..
واقفه تفكر
تحكيله ايه ؟؟
كان ياما كان
كان فيه عصفور
عجَز مع انه صغيور
لا .. لا
لحظه
كان ياما
كان ..
كان فيه تفاحه
كانت قاعده
فوق الشجرة
كتير مرتاحه
قامت الدوده
ماشيه عليها
ودخلت فيها
نخرت جوفها
وخلت جوة جمالها
خراب
لا .. لا
لحظه
هاقولك غيرها
كان ياما كان
كان ..
فيه بنوته
كان نفسها تسمع
حدوته
سمعت من راوي ماهوش بارع
طلعت حدوته

ملتوته

سؤال

تعرف تدور جوة قلبك حبتين

تعرف تقولي اجابه وحده لالف س

انت اللي بره السجن ولا المسجونين

انت قلبك قلب فاضي

ولا راضي

ولا ساكن جوة منه سجين حزين

انا جوة مني الف س

والسؤال الصعب فيهم

انت مين؟؟؟؟؟

اشكي لمين

شامة انا ريحة نار ودمار
شايفة بلاد مضروبة بالنار
صوتها سجين وعيونها بتنزف
ودماها بتكسينـــــــا العار
شفت انا طفل صغير لسه
لسه مقالش يادوب حرفين
مش ضربينه رصـــاصـــه
لا دول والله رصاصتيـــن
خايفين يكبر واحد منهم
يرجع تاني صلاح الدين
شفت كمان بنتين قمرات
ماسكين ف ايديهم رصاصات
ماشيين وعيونهم بتدور
لمحو العسكر واقف يسكر
راحو حدفينهم بالحجرين
حجريـــــــــــــــن طوب
مش ابـــــــــو نفسين
فاهمين معني كلامي ؟
ولا أعيد مــــــــن تاني
واشيل انا وانتو الطين !!!

خلاص كله ضاع

يامصر الحقينا
فقدنا الحماس
ولادك حيارا
كبيرهم صرخ
ألحقوني ياناس
واصغر مافيهم
رمي الكراس
بنهرب ونجري
بعيد عن عنيكي
نلاقي الهروب
من ايديكي لايديكي
ونجري نبص ف عنيكي
نلاقي دموعك بتنزل
وحزنك ماليكي
كتير منا سابك
وفضّل عذاب أم ثانيه
ولا يدوق عذابك
عملتي الحكومة
وقولتي اسمعوهم
وقلنا كلامك مطاع راح نطيع
وكل مانسمع كلامهم نضيع
ونلقي اللي كان شهم
أصبح وضيع
من اللي حاكمنا
لحد الرضيع
خلاص كله ضاع
خلاص كله ضاع
دا حتي الغني والفقير
كله باع
يا أحنا ياهما يامصر
هانقول وداع

ضي وضي

الصعايده يقروها من هنا



ضي وضي

عطشان قلبي لنقطة ماي

قلبي صغير ومالوش زي

ساكن فيا مادافع شيّ

ضي وضي

عطشان قلبي لنقطة ماي

مشتاق قلبي لقلب حنين

يغمره حب ويرويه ري

ضي وضي

عطشان قلبي لنقطة ماي

قاعدة استنظر فيه

ولا جاشي

لقلبي الحي

لقت الدنيا لقلبي

قليب

طيب

ضيه موافق احسن ضي

قالي انا جاي

قلت انا مرحب

وتشرفنا بقلب الخاي

ورحنا حكيـــــــــــــنا

وقلتله قلبي مزيوش زي

خلقــــــــــــــــه الحي

مستنظر من شمسك ضي

او من نيلك نقطة ماي

قالي اباااااااااااااااااااي

قلت لقلبك ان انا جاي

وراح زود علي قلبي الري

و ضي وضي

شبك ايده ف قلب ايداي

وقالي هانبني العمر الجاي

قلبك نيل

وعيوني الضي

ضي وضي

شبع القلب خلاص م الماي 

ووجه بحري  يقروها من هنا


ضي وضي

عطشان جلبي لنجطة ماي

جلبي صغير ومالوش زي

ساكن فيا مادافع شيّ

ضي وضي

عطشان جلبي لنجطة ماي

مشتاج جلبي لجلب حنين

يغمره حب ويرويه ري

ضي وضي

عطشان جلبي لنجطة ماي

جاعدة استنظر فيه ولا جاشي

لجلبي الحي

لجت الدنيا لجلبي

جليب -------- طيب

ضيه موافج احسن ضي

جالي انا جاي

جلت انا مرحب

وتشرفنا بجلب الخاي

ورحنا حكيـــــنا

وجلتله جلبي مزيوش زي

خلجه الحي

مستنظر من شمسك ضي

او من نيلك نجطة ماي

جالي اباااااااااااااي

جلت لجلبك ان انا جاي

وراح زود علي قلبي الري

و ضي وضي

شبك ايده بجلب ايداي

وجالي هانبني العمر الجاي

جلبك نيل

وعيوني الضي

ضي وضي

شبع الجلب خلاص م المااي 

تعبنا ياناس

 

لانك ضرس ف ضروسي وبيوجعني

كلام الجاي والرايح ملسوعني

شربت الشهد من ايدك لقيته مرار

وقلبك جنه مقلوبه لجمرة نار

تعبت خلاص من الاهانات وم التجريح

واخرة تعبي راح ابني لهواكي ضريح

ما هاعمل ايه ؟ بحارب وانتي سيباني

وانا خايفه لييجو ويقطعو لساني

ولو قطعوه هايبقي شهيد

وهاعمل ليه قصيده مليانه

صويت وعديد

هواكي ياحلوة زلزلني

وهد الحيل

وتعبي وذلي برجلني

وفاض الكيل

نبص لفوق

نلاقي ستار مخبي الضي

ومهما فتحنا ف عيونا

ما شايفين شي

نفضفض باللي واجعنا نكلم حد

نلاقي ايدين قوام تتمد

وتمسك ضرسنا وتشد

ماهو انتي الضرس

ماهو انتي الضرس

وجراحك تسمعنا

ومن جزرك ومن مدك

ضروسنا كتير بتوجعنا

تعبنا ياناس

وحتي الااااااااه

بتزود مواجعنا

نفس لونه

نفس لونه

زي لون النيل

سعات

لما اشوف فـ عنيه سكونه

أصل لونه بريء ورايق

ضي عاشق لون شجونه

نفس لونه

مستخبي

جوة لحظه من الزمن

قفلت عيونه

ونفس لونه

هو لون الضحكة

لو طلعت تخونه

لوتصونه

يطرح الفرح ف جفونه

نفس لونه

اصل كونه بريء وطيب

ضحكه بينور عيونه

ونفس لونه

لـّونو قلوبكم وهونو

ادلقو الالوان عليكم

مستحيل ابدا تكونو

نفس لونه

اصل لونه زي لون الشمس

بتزعلل عيونه

بنفس لونه

ادعي يامصر

ابوس ايدك يامصر 

ولادك ف ازمه الحقي وصلي ليهم

انتي ام وقلبك انتي

 دعوته تفتح بيبان كل السما خافي عليهم 

ادعي بلسانك وقلبك

ادعي بولادك وارضك

ادعي من جوة الضلوع

وانتي بتصلي

يامصر صلي بخشوع

حاله موت

 مجروحه زي الطير ولا عندي ريش 

الف مرة بقول لقلبك سيبني اعيش

سبني افرح سبني احزن سبني اموت 

سيبني اطلع للسما مع الطيور

 او سبني جوه ف التابوت

ايوة حبيتك صحيح

وايوة حبك جوه قلبي فعل حاضر

وانتقاله من السما للارض دا شيء مش جديد

جمدت قلبي حجر وتلج معاه حديد

القرار الصعب

مين اختار البعد اسأل ضميرك

ومهما بعدت وضعت وتهت

مش ها تلاقى احن عليك من حضن حبيبك

شوف كام مره جرحت ف قلبي وهنت عليك

شوف الحلم اللي أنت بنيته وبرضه هدمته بنفس أيديك

حضن حبيبك تقسي عليه

قولي انا هاعمل بعدك ايه

كتير حاولت انساك

وأنسى اللى عشتة معاك

لايوم طاوعنى قلبى

ولا يوم طاوعنى هواك

ومهما بعدت وضعت وتهت مش ها تلاقى احن عليك من حضن حبيبك

لازم ها ترجع يوم تحتاج حنان قلبى

ومهما الليالى تطول محتاج تكون جمبى

ومهما بعدت وضعت وتهت

مش ها تلاقى احن عليك من حضن حبيبك

وخدت القرار الصعب وبعدت عن حبيبك

مين اختار البعد اسأل ضميرك

ومهما بعدت وضعت وتهت

مش ها تلاقى احن عليك من حضن حبيبك

علم الخيانه

تلميذه شاطره اخدت جايزة ودكتوراه

في علم جامد حضرتك قلبك بناه

فى علم جامد ضاع معاة عمرى اللى تاة

أزاي تحول دمعتك لألف اه

علم ودرسته وشفت فيه المستحيل

وعلي كل درس شفت 100 مليون دليل 

انا جوة قلب

انا جوة قلب عمل مزاد وراح بايعني

مع انه قلب سكن غلط في شئ جماد

وقفل ودانه عني وقال سامعني

وعشان عشقته قبلت اعيش رغم البعاد

انا جوة قلب الناس بتصرخ اهربي

حرام لطعم النار تروحي تقربي

انا قلت طعم النار دا شيئ مبيتوصفش

وراح قلبي قالها ومتكسفش

الحب نار

الحب دار

الحب مشروب ايوة سكر

بس مليان بالمرار

الصمت

الصمت مش معناه خرص

الصمت صوت  بيرن رنات الجرس

الصمت فن ميعرفوش غير حد ناوي يعيش سعيد

الصمت دنيا وكل أيامك تعيشها جوه  عيد

الصمت  قوة وكبرياء

بيعلمك معني النقاء

الصمت مفقود ف  البشر

والغش وكلام الرياء

 زاد وانتشر زي الوباء 

مستغربين علشان بيطلع مني صوت

عاوزني ايه ادفن علاقاتي واموت

انا يوم ما قررت اني اسكت كانلي قوانين للسكات

مش هابقي زي اللي فضل يكتم ف صوته وطق مات

اسكت عن اللي مالوش جوة حياتي وجود

اسكت عن اللي اخطأهم مالهاش ردود

اسكت ف حالات الكلام بيجيب الم

اسكت وسط الكلام اللي يودي للعدم

الحلم الضائع

حلمت بيك حلم انتهي

مع انه لسه مبتداش

ونسينا أحلامنا البريئة

اللي أتواعدنا متتنساش

وغصب عنا قسيو علينا

وشدو أيدي من أيديك

وجرحوا القلب اللي ساجد

يدعي ماتفارقوش عنيك

جاي النهارده تهد كل اللي أتبنا

قلبي أتصدم وطلعت مخدوعة أنا

هو مين فينا البرئ مين أتظلم

أنا ولا قلبي اللي اندفن جوه الألم

أنا كنت تايهة وجيت لقيت الدنيا دي مش دنيتي

وكنت فكراك طير برئ طلعت ليه من جنتي

ياخسارة الحب اللي حبيته لغريق

سابني أنا ودموعي من وسط الطريق

حقك يامصر

جايز يامصر يكون دا حقك اللي راح يترد

5 اهرامات وقلعة ومنارة ومسله وسد

هزمتي الاسود يلا شدي الاراده

وباقي القرود واهي جايه الاعاده

وانا بسمع الماطش زاد نبض قلبي وزاد الاندهاش

جول جبنا فينا وجون جبنا فيهم وخلص المعاد وفوزنا مجاش

وزاد نبض قلبي وقلوب كل بيتنا وقلوب الجيران

وفرحتنا خافت وجريت وفطت زي الفيران

وفجأه ..... الفيران اللي خافت قلبت وحوش

وصرخت وقالت خلاص انتو فوزتو وميهمكوش

وزادت اراده ولادنا الوحوش

وجه جون مجاش وبرضه اتحسب

دا ربك اراد ويالا العجب

وبدعي بقلبي وكل كياني

انا نفسي افرح ومش عاوزة اعاني

وحقي يعود  وامحي كل اللي فات

تعالو بقوة وقولو يارب انت عالم بحالنا

زمان انهزمنا وبرضه انضربنا

وجه وقت رد المظالم  وانت الكبير

واخر كلامي فيه انذار

لمنتخب مصر كونو شعلة نار

هاتولنا انتصار

كشكول الاحلام

انا عاملة لأحلامي كشكول

أوراقة مرصوصة بالطول

ارسم فيها الحلم الوردي

يقلب لونه رمادي ويصرخ لازم ترضي

ارضي بايه ؟؟؟

حلمي الضايع وسط ضباب الكون ؟؟؟

ولا الرسومات المرسومة بنفس اللون ؟؟؟

ارضي بايه ؟؟؟

ارضي بكسر جدار القلب ؟؟؟

ولا بحلمي اللي مليت أيامي بلونه وفجأة أتكب ؟؟؟

ارضي واسكت خالص خالص!!!!!!

لا مش هاسكت ها فضل أقول

هافضل أرص الأوراق فوق بعضيها بالطول

خرابيش

اذا كان طناشي انا ع اللي صدر طيبه

هافضل اقول ع الدنيا دي عجيبه

اطلع لسابع سما ........... انزل لاخر ارض

اطلع من الكارثه الاقيني في مصيبه

طأطأ طؤ
حرك قلبي وخلاه يدؤ
طأطأ طؤ
اوعي لقلبي ف مرة تزؤ
طأطأ طؤ
ايوة انا قلبي ف حبه مثالي
بس اما اغلط اوعي تدؤ
طأ طأ طوء

الله عليك طباخ كبير طبخت مصر ف طبختين

عصير هباب شربة بلاوي لا وايه المحشي طين

يانهار ملون لون حزين

طب يلا قولي السفرة فين

يا صيدلاني الهوي اديني برشامه

تداوي جرحي انا ومتسيبش ليه علامه

او حتي شربة دوا طعمه يكون مقبول

اتخبي فيه م الهم وانسي اني بردانه

فازت قلوب البشر وخسرت انا قلبي

 معرفش ايه ذنبهم ولا عارفه ايه ذنبي

 فيه اللي خان او جرح وفيهم المقتول

 وفيه يحط السم جوة كلام معسول