أي حاجه

قالوا كلام كنير مدخلش راسي منه حاجه
ومهزش من حماسي ولا غير أي حاجه
بنسيب كل الأساسي ونحكي ف أي حاجه
لو قاعدة أنا ف مكانهم راح احكي ف كل حاجه
بحث وبيناقشو فيه مش فاهمين منه حاجه
بتسيبو كل حاجه وتحكوا ف أي حاجه
غلطانة أنا ف كلامي وبعك ولا حاجه
خلاص خلاص راح امشي
عاوزين من عقلي حاجه؟
ماخلاص معدش حاجه
صدعت من كلامكم ومعدش عندي حاجه
انا هامشي خلاص سلام وباي وكل حاجه
ولا عايزة منكوا حاجه ولا تاخدو مني حاجه

حلم

لو كنت أنا الرئيسة أو كنت ف يوم وزيرة

راح أغير كل حاجه واعمل حاجات كنيرة

هاتقولوا عقل طفله لا دانا ف دماغي مسيرة

ومظاهرة هتافها زايد ومسابق ع الوتيرة

عارفين راح اعمل إيه لو كنت أنا الكبيرة

راح اجمع كل شعبي واخذ منه الحصيلة

والغي العملة نهائي واعمل سلع كنيره

واسيب الشعب ياكل الهانم والفقيرة

خد قد مايكفي حاجتك ماهي الحاجات كنيره

هاتنامو علي الحرير وراح ألغيها الحصيرة

من غير كلام كتير الشعب هايبقي روحي

وهاعلي الشعب كله واداوي بيه جروحي

دنيتي

بحبك ياحلوة ياطعمة ياسكر

ياقالبه كياني وفيكي بفكر

وعقلي مثالي بيعرف يقرر

ويقدر يسيبك لأنه مخير

لكن قلبي حبك وأصبح مسير

مالوش غير طريقك وعمره القصير

بحبك يادنيا ياحلوة ياسكر

إنسان غريب

انسان غريب حقيقي مش فاهمه منه حاجه
بحس معاه سعات إني ف غاية السعادة
وسعات بحس منه بضيقه بالزيادة
أوعاك تكون فاكرني إني ف غاية السذاجة
دانا فاهمه كل حاجه
دي طبيعة أي راجل مش حركه والسلام
يرمي شباكه ويبعد ويستني التمام
وهاتيجي هي راكعة وكمان تبدأ كلام
متعبش جنابة خالص ودي فكرة السلام
والست عشان ضعيفة وبتملك قلب نونو
حسبت صيادها فارس والحب راح يصونه
وأبو عقدة الخواجه فينا يطلع جنونه
وأنا مش منهم ياسيدي أنا خالص مش شبهم
ماملكش حاجه منهم إلا يادوب لقبهم
من بره شكلي ست لكن جوايا راجل
وطبيعته شيء مثالي فارس ومعاه مناضل
وف دمي سبته ساكن شارب منه وواكل
وعمره مايوم جرحني شايل عني المشاكل
واقله عارفه أعيش من غير ما أأذي حد
وبحب الدنيا جدا مع إنها بجد
آذتني آذيه جامدة معدش ليها عد
وبقول خلاص حياتي وها عيشها صد رد
من غير ما اتاذي ولا أأذى فيها حد
ومعاك أنا رحت لابسه أسفه ف حيطة سد

أنت مين

هو أنت مين؟؟

علشان تعذبني سنين

وعايشلي ليه دور الأمين

أنت مين ؟؟

دخلت ف حياتي بخدعه و100 كمين

أنت مين ؟؟

أنت الحرس ولا قضبان المكان ولا السجين

مثلت علي قلبي الحنان ويا الحنين

أنت مين؟؟

مين اللي داين للتاني فينا ومين مدين

كسرت قلبي بكل قسوة وخليته حزين

أنت مين؟؟

دي حكاية لو كان عايش كان حبها يوسف شاهين

وكان بليغ لحنها غنوه كلماتها من أفكار جاهين

أنت مين؟؟

عمرك في يوم شفت فيه شياطين ملايكه وطيبين

عمرك ف يوم شفت ان اللي بره السجن هما المذنبين

أنت مين؟؟

زي زرع وكنا بالخير مرويين

الميه نشفت وليه بالخوف بقينا مليانين

أنت مين؟؟

لو كلامك كان دوانا كنا متنا مسمومين

ولو ف قلبك كان سكنا كنا متنا محروقين ومخنوقين

أنت مين ؟؟

مقترح مشروع عمري

إحساس مش عارفه أقوله إحساس ميتوصفش

أنا عشت عمري طوله عايشه ف الدنيا قفش

حرب وقلبي الضعيف دخل فيها ومخفش

المشروع اسمه ضحكه ورا بابا بيتنا السعيد

نملاه راحة وسعادة وطيبه وحنان أكيد

وهانمحي عيوبنا خالص وها نبدأ من جديد

وشروطي هي بيت رايق وكله راحة

وكل ركن فيه مليان حب وسماحه

وكل يوم في قلبك هاعمل رحلة سياحة

ننقل من الهدف ونروح علي الوظايف

أنا هابقي كل حاجه ودا عشان تبقي عارف

وأنت مدير الإدارة وعلي كل حاجه شارف

والميزانية ياسيدي مالهاش حدود نهائي

ملايين من المشاعر وشويه عقل باقي

أطنان طيبه وحنان مفيناش من الهوائي

ومتنساش وأنت طالع تاخد أيدي بأيدك

من خبراتك تزيدني ومن خبراتي هازيدك

وأنا هابقي زي ضلك زي الدم ف وريدك

هافضل طول عمري ماشيه خطوة بخطوة وراك

وهاتبقي وظيفتي راحتك وأنت سعادتي رضاك

وهاتبقي حياتنا شركة علي هوايا وهواك

وأنا ليا نسبه ثابتة ف الحب والاحترام

لو قلت يوم ونقصت هانغير ف الكلام

وهاتبقي الشركة فاشلة ومالهاش اهتمام

لو مره جرحت قلبي ونسيت الانسانيه

تأكد .....تأكد هانصدم وهابقي شرانيه

هافوت غلطه ليك وتفوت غلطه ليه

وعشان تبعد نهائي عن قلبي مايهلكه

خليك معاه رومانسي ( حنين ) وأنت هاتملكه

وتشكل فيه براحتك تبنيه وتدربكه

أنا كده خلصت يلا امضي هناك ف اليمين

وقبل ماتمضي احلف خمسين مليون يمين

انك هاتراعي ربك فيا وهاتكون آمين

( سكته ) رمز موجود ف الموسيقي

صول لا سي سكته طا

البنا هد اللي بناه

وكان طول عمره بيتمناه

وكمان الموت جاي وراه

وراح ينسي كل اللي هواه

صول لا سي سكته طا

صول لا سي سكته طاطي

انا سامعه عياطكم وعياطي

وشامه ف قلبي ريحه شياطي

اطفال للموت قال بتطاطي

ماهو صول لا سي سكته طاطي

صول لا سي سكته فادو

تلاميذنا نسيو مادرسوه

وحلفو براس ابوهم ماخدوه

ولا فادهم علم ولا فادوه

معرفش انا ليه قوام نسيوه

صول لا سي سكته فا دو

صول لا سي سكته لا صول

اكتم صوتي انا ولا اقول

اخدو بالتار للعايش ونسيو ياخدوه للمقتول

مين عنا ياعالم مسئول

ياتري حورس او ابو الهول

صول لا سي سكته لا صول

ناس تفرح وتعيش شيكا بيكا

وناس تدرس جبر وميكانيكا

وقلوب بتغني وبتعيط

وقلوب بتكتك تكتيكه

وتجينا السكته دا شئ عادي

مالسكته كمان ف المزيكا

وبقول ف الاخر ياخوانا

دو ري مي وقتلنا البنا

دو ري مي وخسرنا ولادنا

دو ري مي ولا حد حامينا

دو ري مي ولا هاري بدنا

رباعياتي

مالك ياقلبي ليه حزين مكسور

انفض همومك كسر حيطان السور

خليك جنينه اوعاك تكون مهجور

دا اللي حب الضلمه عمره مايعرف يشوف النور

مالك كده عايش ف وحدة والم

بتتنقل من الفراغ للعدم

تحزن ماتحزن هاتشوف ف يوم الندم

لو قصر احلامك بنيته اتهدم

ياقلبي ياللي الطير اكل جوفك

واللي خدمته ولا حس معروفك

عمض عنيه عنك ولا عمره هايشوفك

هاتشوف كتير ياما واهو انت وظروفك

زي الهوي ولا حد حاسس بيك

تعشق قلوب تلاقيها قاسيه عليك

تضحكلك الدنيا وتنحني في يوم ليك

بس انت اصحي وبص من حواليك

عارفه ان احزاني تهد جبال

لو فقت انا كنت ابقي عال العال

لو فرح صابني الهم كان اتشال

امشي يمين الاقي نفسي شمال

دانا قلبي عامل زي نجم السما

جواه يادوب يجي 300 ملحمه

ويادوب بضل نور الشمس احتما

وكانه طير طاير بدون وجهه كانه اتعمي

واحشني

واحشني حنانك ونظرة عنيك

واحشني إني اصحي وأنام بين عنيك

وحشني ان اشوفك واطمن عليك

تلف الليالي وادور عليك

واقول اني احبك واخبي عليك

وقلبي يموت لو ميحلمش بيك

ياضحكة حياتي بدور عليك

دي كل السعادة معاك وبأيديك

واحشني وقلبي وعمري وحياتي

الــــــــــــــــــــــــيك

لحظة ضعف

يوم ماقبلتك كانت كل عواطفي ف لحظة ضعف
يوم ماعيونك قابلت عيني كانت اللحظة دي فوق الوصف
عارف ليه ؟؟؟
علشان حبك حلم جميل
نسمة ليل
غني ومواويل
عارف ليه ؟؟؟
علشان حبك م الأحلام
شوق وغرام
سكوت وكلام
عارف ليه ؟؟؟
تزعل مني
وتغيب عني
وتبعد والحرمان يقتلني
وترجع تاني بحلم جميل
وقلب أصيل
ف لحظة ضعف
ويوم ماقبلتك
كانت كل عواطفي ف لحظة ضعف

ياخيبتك ياقلبي

ياخيبتك ياقلبي

اضحك ياقلبي يا حزين علي خيبتك

ضعت ويا الناس وضاعت هيبتك

ماكنت فاكر انك هاتكبر

والناس هاتتعجب من كتر شيبتك

جرحوك محسوش انك أنت رقيق

وف بحر اوهامهم وقعت غريق

وأنت اللي زي الطفل طاهر وكنت بريء

تهموك بتهمه مالكش فيها أيدين

والحق عندك وأنت صاحب الدين

مع ناس خانونا ولعبو بينا سنين

تهموك بكدب وعمره ماكان فيك

ومشيت وقعدو قال يشاوروا عليك

والدنيا سحبت ايدها من حواليك

والله ياقلبي عليك لأكون شمشون

لحد ما الخاين عليك هايهون

وبيك راح اقوي وأهد بيك الكون

عارف ياقلبي انك وحيد مجنون

بتدور علي قلب رقيق وحنون

ووقعت فاللي قدر يسيب ويخون

أوعاك تخاف من رفعة الأسلحة

ولا قلب متعود علي الانزحه

والبعد عنه ليك أكيد مصلحه

عارف ياقلبي ياحمار الحمير

هاعمل عليك أنا 100 حرس وغفير

كانك هاتترقي وتبقي الزير

والكل يشرب من حنانك شرب

والناس هاتتمني إليك القرب

وأنت حديد سايح وفيك اتصب